“خصائلِ مصطفیٰ ﷺ – ادارہ جاء الحق کی روح پرور کتاب”
خصائلِ مصطفیٰ ﷺ ادارہ جاو الحق کی جانب سے شائع کی گئی ایک عظیم الشان روح پرور کتاب ہے جس میں اسلوب یہ اختیار کیا گیا ہے کہ سب سے پہلے قرآن پاک سے دلائل ذکر کیے گئے ہیں، پھر حدیث کے حوالہ جات، اس کے بعد علماء و صوفیاء کرام کے اقوال اور آخر میں عقلی دلائل پیش کیے گئے ہیں تاکہ پڑھنے والے کے ذہن میں کسی بھی موضوع سے متعلق کوئی شبہ باقی نہ رہے اور دل میں نبی پاک ﷺ کی خصائل، عظمت اور محبت مزید راسخ ہو جائے۔ یہ کتاب دراصل عشقِ رسول ﷺ کو پروان چڑھانے اور قلوب کو نورِ ایمان سے منور کرنے کا ذریعہ ہے۔
بشریت و نورانیت مصطفیٰ ﷺ کے عنوان کے تحت نبی کریم ﷺ کی بشری صفات اور نورانی حقیقت کو نہایت دلنشین انداز میں پیش کیا گیا ہے، علمِ مصطفیٰ ﷺ کے باب میں آپ کو عطا کردہ علمِ غیب کی جامعیت کو واضح کیا گیا ہے، ذکرِ جمال مصطفیٰ ﷺ میں آپ کے حسن و جمال اور سلوکِ مبارک کی جھلک دکھائی گئی ہے، رحمتِ مصطفیٰ ﷺ میں آپ کو سراپا رحمت بنا کر بھیجا جانا بیان ہوا ہے، شفاعت مصطفیٰ ﷺ میں قیامت کے دن آپ کے مقامِ شفاعت کو اجاگر کیا گیا ہے، مقامِ محمود میں اللہ تعالیٰ کے عطا کردہ اس بلند مرتبے کی تشریح کی گئی ہے، ملکیت مصطفیٰ ﷺ میں یہ بتایا گیا ہے کہ کائنات کی کن کن چیزوں کی ملکیت حضور ﷺ کو عطا کی گئی، قاسم ہونا کے تحت یہ بیان کیا گیا ہے کہ آپ ﷺ اللہ کے خزانے تقسیم فرمانے والے ہیں، رفعتِ ذکر مصطفیٰ ﷺ میں یہ حقیقت بیان ہوئی ہے کہ اللہ تعالیٰ نے آپ کے ذکر کو ہمیشہ کے لیے بلند فرما دیا، بشیر و نذیر ہونا کے باب میں یہ بتایا گیا ہے کہ آپ ﷺ خوشخبری دینے والے اور ڈرانے والے دونوں ہیں، معراج و دیدارِ الٰہی میں وہ عظیم واقعہ بیان کیا گیا ہے جس میں حضور ﷺ نے ربِ کریم کا دیدار فرمایا، اور آخر میں مصطفیٰ جانِ رحمت پر لاکھوں سلام کے ساتھ کتاب کا اختتام کیا گیا ہے جو پڑھنے والے کے دل کو عشق و محبت کی روشنی سے منور کر دیتا ہے۔
زیرِ نظر تصاویر اس کتاب کے چند منتخب صفحات کی جھلکیاں ہیں جو قاری کو اس بات پر مجبور کر دیں گی کہ وہ پوری کتاب کا مطالعہ کرے اور عشقِ رسول ﷺ کی لذت کو اپنے دل میں محسوس کرے۔
۔